دكتوراة جديدة لصفوت حجازي بعنوان : كيف تقنع الغلابة ان تأييد مرسى عبادة

من أحمد حامد دياب في 8 مايو، 2012‏، الساعة 06:32 صباحاً‏

حضرة صاحب الفضيلة الداعية الانتخابي الاخواني

  المهندس صفوت حجازى 

وامرسياه ..وامرسياه..وامرسياه..وامرسياه

مساء حاير طاير من الجماهيير المصرية لصاحب الابتسامة الذهبية اما بعد

فبخصوص البحث المقدم من فضيلتك بعنوان (تأييد مرسي طاعة وتعبد لله) فبأمر الله هتاخد الاستاذية بجدارة واستحقاق وان شاء الله لو مرسي نجح هتاخد مع الاستاذية وزارة الاوقاف الا بقا اذا كنت بتلف اللف ده كله وبتفتى الفتى ده كله لله  واعتقد انه لو كان لله كنت قلت كلام يرضى الله يا هندسة 

اخر خطبة سمعتها من حضرتك وقعدت اعيط بسببها  كانت فى مؤتمر ترشيح المرشح الاحتياطى اللى نزل اساسي فى الشوط التانى وبيكمل الماتش محمد مرسي (وامرسياه)

واسمح لى اتكلم كلمتين بالعربي عشان نفهم بعض

 واولا يجب ان يعرف جميع الناس مؤهلات فضيلتك العلمية التى جعلت منك عالماً من علماء الامه..!!!حيث تقول ويكيبيديا ان فضيلك حاصل على ماجستير تخطيط عمرانى--لا علاقة له بالدين-- ثم حصلت على دبلوم الحديث من جامعة ديجون بفرنسا!!! اى انك درست الحديث الشريف على ايدي كبار المحدثين الفرنسيين ولا اعلم هل درست الحديث بالفرنساوى ولا الانجليزى؟؟والمسيو اللى علمك الحديث هناك دينه ايه اصلاً؟؟؟وبعد كده فضيلتك أخدت الدكتوراه فى العقائد ومقارنة الاديان من جامعة ديجون بفرنسا يعنى حضرتك درست الدين فى فرنسا!!هو حضرتك درست دين مين بالظبط؟؟

واسمحلى اتكلم بالمفتشر كده عشان الناس تصحصح معانا بالصلاة على النبي كده اللى انا اعرفه ان الدين الاسلامى له مكان اسمه جامعة الازهر مش جامعة ديجون بفرنسا يا بركتنا

وعموماً ان برشح حضرتك لمنصب مفتى فرنسا  واهه لقمة طرية وربنا يحنن عليك ويرزقك  

واخر تصريح قريته لحضرتك على بوابة الوفد  ولا اخفى على فضيلتك انك أخدت درجة  الاستاذية  وبجدارة  فى التجارة فى  الدين شعبة انتخابات رئاسة بسبب البوقين دوول مع توصية بطبع الرسالة على نفقة اللجنة الالكترونية 

إن مع مرسى لن يكون إلا شرع الله(على اساس ايه؟؟)، وأنه الوحيد الذى سيطبق الشريعة الاسلامية(هو احنا كفره ياخى)، والحدود، مضيفاً إن تأييده طاعة وتعبد لله(مش كده والنبي ؟؟)، كما أنه سيعيد المجد لمصر وللإسلام ويعيدنا، لزمن صلاح الدين وسيف الدين(اومال لو كان اساسي مش احتياطى كان اعادنا لزمن مين؟؟ أكيد النبي؟؟!!).كما أوضح حجازى أن تأييد مرسى جاء ليطعمنا حلالا من رزق يرزقنا الله إياه(هو مرسي اللى هيطعمنا؟؟!!)، فضلاً عن أنه رجل وراءه رجال(وراءه بيعملوا اية بالظبط؟؟)، لا يستفرد به المجلس العسكرى(طيب ادينا أمارة) ولا أمريكا(بامارة اجتماعه مع  جون كيري وسفره كل شوية لواشنطن)، وليس وراءه مخنثون أو ومائعون(لكن وراءه كاذبون وللوعد مخلفون)، ولايتقاضى أموالاً من الخارج(اومال الفلوس دى كلها منين؟؟).وتابع الداعية الإخوانى:نحن وراءك أقوياء يا مرسى، أيدانك لحلم كبير يحلم به علماء الأمة، وليصلى بنا فى بيت المقدس(يا عم الشيخ مرسي معندوش مانع من كامب ديفيد والسلام مع الصهاينة الانجاس ؟!!!والله انك عايش فى غيبوبة)، والهيئة الشرعية للحقوق والإصلاح أيدتك حتى تكتمل الثورة(هى الهيئة دى شاركت فى الثورة بداء من الدقيقة كام؟؟)، لأنك عانيت مثلما عانينا وظلمت مثلما ظلمنا.(بصراحة اه ..هو مكنش له برنامج على قناة الناس زيك )

-

اقول للبركة الحاج صفوت حجازى

يا عم الحج مش من حقك تتكلم باسم الاسلام لانك لا مبتمثلش  الا نفسك 

تمثل نفسك أه  تمثل الاسلام لا.. لا.. لا ..تمثل علينا بلاش ربنا يسترك

عشان الشعب ده شبع بصراحة يعنى

وكمان مين قال ان تأييد مرسي طاعة الله

الحمد لله الوحى اتقطع  بموت محمد صلى الله عليه وسلم ومرسي ده بشر يخطئ ويصيب ومالوش دعوة بالاسلام  وده فرد من مليار فرد مسلم  وكمان  مش منزل من السماء يا هندسة  

وكمان أحب أسئل معاليك لو مرسي غلط او فشل هل هيبقى الاسلام فشل؟؟هو مش مرسي ده ممكن يغلط ويعمل اى ذنب؟!!ابوس ايدك يا بشمهندس صفوت كفاية بقا لعب بدين ربنا

وكفاية بقا تجارة بدين ربنا

حرام عليكم ناقص تقولوا ان مرسي ده المهدى المنتظر

اتق الله ياوكفاية ربنا يهديك

وكنت عاوز اسئل حضرتك  كام سؤال مهم جداً

 هل يجوز الاستغاثه بالنبي او أحد الصالحين؟؟

طيب وهل يجوز الاستغاثه بمحمد مرسي؟؟

هل يجوز اننا تقول وامرسياه؟؟

مش ده اسمة استغاثه  بغير الله ويعتبر شرك اكبر  فى مذهبكم يا بركة؟؟

انا سمعت امبارح واحده بتقول وامرسياه 

قلت لها قولى لا اله الا الله يا حاجه لانك كده اشركتى!!!! 

 طيب سؤال رخم شوية وانا عارف ان الموضوع ده بيضايقك بس هنعمل اية بس

كنت عاوز استفسر عن.....(( اللى بالى بالك))

يا ترى السي دي بتاع شقة العجوزه لسه مع حضرتك؟؟

يا ترى اتفرجت على السي دي ده كام مره؟؟

وياترى الفرجة على  السيديهات دى حلال ولا حرام؟؟ 

المقال منشور فى فيس بوك

من عبدالناصر الى أحمد ماهر((اديك تقول ماختش))

من أحمد حامد دياب في 22 يوليو، 2012‏، الساعة 04:56 صباحاً‏ 

عزيزى الفاضل    أحمد بك  ماهر (بتاع 6ابريل) السلام عليكم ورحمة الله وبركاته 

اما بعد

أحييكم بتحية الثورة((عيش -حرية-عداله اجتماعيه))  وأحب ان ألفت نظركم الى معلومه بخصوص ثورة العسكر الماجنة الفاجره الداعره ثورة يوليو المجيدة والتى كانت بداية لحكم الشعب للشعب فلعلك لا تعرف ان اسرة محمد على غير مصرية  الاصل وحكمتنا حوالى مائة وخمسون عام وحينما قامت ثورة يوليو  كان ذالك حكم الشعب المصري نفسه لاول مره فى التاريخ الحديث فجمال عبدالناصر ومحمد نجيب  والسادات هم من عامة  الشعب سواء رضيت سيادتك او لم ترضى  (غصب عن عينك يعنى) 

ثورة يوليو من أعظم الاحدث فى العصر الحديث وكانت ثورة محترمه من رجال وطنيون  

رجال لم يتلقوا تدريب فى صريبا ولا غيرها بل دربوا اغلب شعوب الارض المقهورين على الثورة ضد المستعمر وقاد عبدالناصر عمليات التحرر فى العصر الحديث وكان الامل لجميع الشعوب  المقهوره فى الارض  وبث فيهم الروح من جديد ودعم جميع حركات الكفاح المسلح والثورى فى الدول الافريقة والعربية وكان عبدالناصر زعيم بما تحمله الكلمه من معانى الزعامه الوطنيه((اى نعم هو مكنش مثالى  لان اخر حاكم كان مثالى هو الخليفة عمر بن عبدالعزيز لكنه حاله تستحق الاحترام))  وكان صاحب حلم القوميه العربية وكان العدوا الاول للغرب وللصهاينه وللامريكان ولم يذق فى حياته طعم الشاى بالياسمين فى اى مكان بل كان يشرب مما يشرب منه المقهورين   فى الارض ويشعر بهم و 

قام بتوزيع اراضى الاقطاع على الفلاحين وكان عبدالناصر هو فارس العداله الاجتماعيه والغى البشوية والبكويه حتى لا يكون هناك مصرى أفضل من مصري واقام التعليم المجانى(وربنا يسامحه بقا خلانا نشوف العاهات دى)  الذى تسبب فى ان أمثالك تعلموا القراءة والكتابه وملايين غيرك تعلموا  من بركات ثورة يوليو المجيده

ليس كل العسكر سيئون وليس كل الثوار شرفاء فهناك من تدرب فى صربيا وهناك من شرب الشاى بالياسمين بكثرة حتى صفح الكيل على صدره وتقياء بكلام لا يرضى الا اعداء الوطن

ولا أخفى عليكم ايها الفاضل ان تصريحات مثل تصريحات سيادتكم تسبب  فى ظهور أمثال توفيق عكاشه بالزعماء الوطنيين والمخلصين !!!((روح يا شيخ ربنا يسامحك بقا))

وكأننى أسمع خالد الذكر الزعيم جمال عبدالناصر وهو يرد عليك بلغة القرن الواحد والعشرين ويقول                      

((اديك تقول ماختش يا ناكر الجميل وان شفت تقول مشفتش متشكرين يا أصيل))

 شكراً لمن علمونا الثورة::شكراً لرجال 1919 شكراً لسعد  زغلول::شكراً لعبدالناصر ورجاله::شكراً للبرادعى ورجال وشهداء ثورة يناير وهكذا يكون المصري حافظ للجميل  فحفظ الجميل من صفات الرجال الاقوياء 

وان كنت تعتقد ان نجاح ثورة يناير يلغى نجاح ثورة يوليو فعذراً لو كان فكرك هكذا أعتبرك من السذج  والحمقى فثورة يناير لم تبداء بعد!!!!

 رجع الاجازات اللي انت اخدتها طول حياتك عشان ثورة يوليو .... والسلام

المقال منشور فى الفيس بوك

أحمد حامد دياب: كم تتكلف صلاة الرئيس؟

الأحد 26 August 2012 - 03:10 م

أحمد حامد دياب: كم تتكلف صلاة الرئيس؟

كتب: 

أحمد حامد دياب

الحمد لله الذى استجاب دعاء ملايين المصريين ورزقنا برئيس (أوبهه) يقيم الصلاة جماعه ويصل رحمه ويعتمر والحمد لله رب العالمين ..ولكن لى سؤال يقف فى منتصف زورى يكاد ان يقتلنى فطيس ..هذا السؤال هو كم تكلفة صلاة السيد الرئيس؟؟!!! سؤال يؤرقنى يا ساده ..فعلى مدار شهر رمضان المعظم الكريم كلنا شاهدنا تدين الرئيس مرسي المفرط واصراره على اقامة الصلوات وخصوصاً التهجد والقيام وغيرها  فى المساجد وكنت أود ان أتوجه لفضيلة الرئيس مرسي ببعض الاسئله:-

 اولاً حينما تذهب للصلاه هل تذهب بسيارتك الخاصه ام بسياره الدولة المصريه(التى اشتريت من اموال الشعب)؟؟

هل البنزين الذى تحرقه هذه السيارة من أموالك الخاصه ام من مال الشعب؟؟

هل سيارات الحراسة التى ترافقك وفاتورة  البنزين والمصاريف الاخرى اللتى تتكبدها الرحلة للمسجد من يدفعها؟؟

 ما هى تكلفة  أدائك لصلاة الفجر ومن يدفع هذه التكلفه؟؟وهل لو صلاة الجماعه أفضل من صلاة الفرد ب27درجة هل فى حالتك هل أفضل أيضا؟؟

أعتقد ايها الرئيس اننا لم ندفع الضرائب لكى تصلى بها او تعتمر!!

لى سؤال أخر يقف اسفل حنجرتى وأود ان اسئلك عن العمرة التى اديتها فى بداية حكمك...من دفع مصاريف العمره؟؟..من دفع تذاكر الطيران؟؟ من دفع ثمن ثوب احرامك ومتاعك ؟ومن دفع ثمن أكلك وشرابك؟؟

ما أعظم صلة الارحام حينما تكون لارضاء الله عز وجل

وما أقبحها حينما أركب الطائرة التى اشتراها الشعب بامواله واستهلك وقودها الذى دفع ثمنة الشعب الفقير لكى اذهب الى الزقازيق لازور أختى المريضه؟!!!!!

حسبنا الله ونعم الوكيل..لاننا لم ندفع الضرائب لتصلى بها ولا لتعتمر بها ولا لتزور اختك بها

وخلاصة القول ---  اذا اردت ان تصلى او تعتمر او تصل رحمك فليكن ذلك على نفقتك ومن مالك الخاص لاننا لم ندفع الرسوم والضرائب لكى تصلى بها وتعتمر وتزور اختك وبقية العائلة !!!!اتق الله يا فضيلة الرئيس

والله الموفق والمستعانالمقال منشور فى جريدة البديل الألكترونية

أحمد حامد دياب : اللهم ارض عن الرئيس الجديد

الأربعاء 27 يونيو 2012 - 10:55 ص

كتب: 

أحمد حامد دياب

من يوم ما الرئيس الجديد المنتخب نجح (ربنا يارب يوفقه ويعينه ويوفقنا فى معارضته وتقويمه) وانا ملاحظ ان شباب فيسبوك ابتدوا فعلاً فى تعظيم الحاكم وتضخيمه ونفخه علينا وبدأت الخطوات الفعلية فى صناعة الفرعون

انا مش معترض على الرئيس الجديد لان هى دى الديمقراطية لكن انا معترض على تعامل الشعب معاه من أول يومين تلاقى واحد يقول ده الرئيس النهارده مشي على رجله!! التانى يغنى ويقول الرئيس نزل من العربية بنفسه!!التالت يلحن ويقول وقف فى البلكونه بنفسه!!! الرابع يرد يقول ده ما شاء الله سلم على واحد واقف!! يقوم الخامس بقا يجيب صورة ابنه ويقول ابن الرئيس قال ماليش دعوه بابويا!! والخامس يلحن عليه ويقول مرات الرئيس قالت مش عارف ايه!!

ناقص بقا الناس تقول ده دخل الحمام لوحده واتشطف لوحده وناقص كمان يقولوا ان من كرامات الرئيس الجديد انه بيرد على موبيله وانه بيلبس شبشب بلاستيك فى الحمام  وبينام فى جلابية وانه ما شاء الله متواضع لدرجة انه بياكل فول بالزيت واللمون  وماشاء الله على تواضع الرئيس الجديد النهارده كان ماشي فى الشارع ولا حول ولا قوة الا بالله العلى العظيم ونعيط من الفرح بالرئيس الجديد!!!

الواضح جداً اننا لسه مترسختش عندنا فكرة ان الرئيس ده موظف عند الشعب وواضح برضه اننا مازلنا عندنا عقدة صناعة الحاكم  كاسطورة!!

لكن لازم نقول الحق ..الحق ان اوباما أكبر رئيس لاكبر دولة فى العالم  بيمشي فى الشارع ومن غير ما يفقل الشوارع برضه وكمان بيهزر مع الشعب حتى مع عامل النضافه (الزبال يعنى ) وكمان بيتصور معاه وممكن يألش عليه عامل النضافه اللي هو الزبال ويعلم عليه كمان!! كذالك رئيس وزراء هولاندا بيروح شغله بالعجله ولو الكوتش نام منه  بيسحب العجله ويمشي بيها عادى كده ومن غير ما يتصور والهولانديين يقولوا شوفتوا رئيس الوزراء متواضع ازاى والنسوان تزعرت ويقولوا ايات واشعار فيه!!!

ثقافتنا لازم تتغير .يعنى مش لو الرئيس صلى الضهر نصوره ونقول لقد صلى الرئيس الضهر ونروح قايلين آيتين قرآن وقد قام سيادته بصلاة السنة ركعتين بعد الصلاه (تكبييير) وبعد كده نقول والجدير بالذكر ان الرئيس قد توضأ بنفسه وبدون مساعده من اى شخص اثناء الوضوء أو الاستنجاء!!!

وبعد شوية نجيب صورته وهو بيتغدى ونقول لقد مسك السيد الرئيس الملعقه بيده وتناول الطعام القرديحي اللي اتعمل بمية من الحنفية وقد اعدت الطعام زوجته الفاضله وأكل سيادته بالعيش وشكر الله ونروح قايلين آيتين قرآن !!!(كلوا من طيبات ما رزقناكم)

والنهارده الرئيس كان معدى قدام محل عصير والدنيا حر وقد نزل سيادته من السيارة وقام بطلب شوب عصير دوبل ثم دفع الحساب اه والله دفع الحساب ثم شرب سيادته العصير(وجلعنا من الماء كل شئ حى)

خلاصة الكلام الرئيس ده له برنامج لازم اننا نحاسبه على تنفيذه .. ونحاسبه على التضخم والاحتياطى وارتفاع الاسعار وغيره

وله برنامج لازم يتحاسب عليه ولو نفذ اى حاجه فيه مش لازم نغنى له اخترناك اخترناك !! لان الناس انتخبته عشان يعمل كده فعلاً .. يعنى هو موظف بعقد عمل  لمدة معينة ملزوم بخدمة جموع المصريين يعنى لو خدم فده الواجب يحاسبه عليه ربنا واحنا كمان نثنى عليه يوم ما ينفذ برنامجه ولو مش نفذه اولاً ما انتخبوش تانى ونورى له العين الحمرا وكمان ربنا هـ يسأله وحساب ربنا هيكون عسير

خلاصة الكلام  اللي يتلسع من حسنى مبارك ينفخ فى محمد مرسي يعنى الرئيس ده واحد زينا اخترناه عشان يدير مصالحنا يعنى زى ناظر العزبة بالضبط واحنا اصحاب العزبة

فـ ياريت نغمة تعظيم الحاكم دى بلاش منها وفى تصرفاته الانسانية فدى المفروض انه بيعملها من دافع ضميره وربنا هـ يحاسبه عليها الا لو كانت رياء ومنظره وده طبعاً اللي يعرفه ربنا بس

ولو عمل انجاز هنحس بيه كلنا وكمان هيبقى تنفيذ لبنود العقد اللي بينا وبينه

الحكاية بالظبط زى ماتكون انت اتعاقدت مع مقاول يبنى ويشطب لك بيت

وانت كل لما يبنى طوبه تعمل هوليله وفرح (هو لسه مبناش لكن احنا بنتكلم عن الواقع) وكمان لما يعمل حاجه يعنى مثلاً المقاول راح محلات مش عارف ايه فى العتبة واشترى حزام وتقعد بقا تصورة وتصور الحزام وتعمل ليله وتوفيق عكاشة يتكلم عن نوع الحزم وانه جلد ماسونى مفتخر وان وائل غنيم لابس واحد زيه

الرئيس ده عباره عن سواق احنا أجرناه عشان يسوق عربية مصر فلما يدور العربية مش لازم كلنا نهلل لان ده دوره ولما ينقل على الغيار الاول مش لازم نزعرط ولما يجيب التانى مش لازم نعيط من الفرح ولما يفتح فى السرعه مش لازم  يغمى علينا!! كمان لو أكل مطب لازم نشد عليه ونقوله مش تفتح ؟؟؟ (لانه بيشتغل عندنا) ولو رجع مارش لازم نصحصح معاه ونشوفه هـ يخبط فى مين ونحاول ننبهه ونفاديه وننزل نزق معاه لكن هو السواق واحنا أصحاب العربية!!!!وكل واحد لازم يعرف حدوده

يا ريت ثقافتنا تجاه الرئيس تتغير ولازم نعرفه ان احنا اللي جبناه عشان يمشي مصالحنا مش عشان  فرعون ويتحكم فينا

ويا ريت معاملتنا للرئيس وعياله ومراته  تبقى زى معاملتنا للسواق أو  للمقاول اللي هيبنى البيت إحنا بنحترمه عشان سنه ومقامه لكن الصح اللي بيعمله واجب عليه وبند متفقين عليه وهو بينفذ الاتفاق والغلط والتأخير ده غلطه وتجاوز منه واحنا لازم مـ نسمحلوش بكده

وكل رئيس وانتوا طيبين

المقال منشور فى جريدة البديل الالكترونية

الحمد لله تاب الله على وسأدخل الجنه مع الاخوان والسلفيين أصحاب الاغلبيه فيها!!!!

أيها الاخوة الليبراليون بعد ان قررت اترك الليبراليه وانضم لجماعة 

الاخوان المسلمين سبت واتنين واربع والسلفيين حد وتلات وخميس 

لانهم حازوا على أكثر من ثلثى مقاعد الجنه لذلك وقفت مع نفسي 

ثم قيمتهم ووجدت اننى على خطاء لمهاجمة هؤلاء الافاضل نظرت 

الى الاخوان هذه الجماعة المحترمه والتى ترتدى ثوب الدين وتبطن 

عشق الكراسي والسلطه وجدت فيها شخص مجاهد مثل محمد 

مرسي ذلك الرجل الذى لم يمل مراراً وتكراراً من طلب مناصرة 

فلسطين عسكرياً فى دورة 2005/2000 والان هو لا مانع عنده من 

كامب ديفيد والسلام مع الانجاس الصهاينه  !! ومنهم ايضاً فضيلة 

المرشد السابق مهدى عاكف والذى ضرب أعظم الامثله فى الوطنيه 

حينما قال (طظ فى مصر وابو مصر واللى فى مصر) وبايع مبارك مدى 

الحياه!! ثم نجد منهم عصام العريان ذلك العبقري والذى أعلن انهم 

لن يشاركوا فى مظاهرات 25يناير 2011ثم ركبوا على أكتاف الثوره 

ومنهم ايضاً الفقيه الدستورى الصول صبحى صالح ذلك القيمه 

الدستوريه والقانونيه الرائعه وصاحب موقعة ايده فى وسطه 

الشهيره ثم نجد منهم ايضاً فضيلة المرشد البديع حفظه الله والذى 

لا يجتمع مع الامريكان الا اجتماعات مغلقه وبدون اى وسائل اعلام 

ومنهم ايضاً أمينة المراءة الشهيره والتى أعلنت ان نساء مصر ليسوا 

بحرائر وانهم يتلقون دعم خارجى وأخيراً منهم ذلك الخلوق الدمث 

الاخلاق سعد الكتاتنى رئيس مجلس الشعب والذى بكى على 

مصابي وشهداء الثوره ثم مسح دموعه وارسل برقية شكر للمجلس 

العسكرى !!!!كفاكم ظلم يا ساده هؤلاء هم الاخوان والذين شغلتهم 

الدوره الانتخابيه عن تشييع جنازة الشيخ عماد عفت والدكتور علاء 

عبدالهادى وشارك فيها الاقباط وامتنعوا عن المشاركه فيها!!!!ولا 

تنسي مواقفهم الوطنيه الجريئه والتى أعلنوا فيها عدم رغبتهم فى 

المنافسه على أكثر من 35% من مقاعد الجنه وبالصدفه البحته 

نافسوا على 100% منها كما لا تنسوا موقفهم الوطنى فى التوافق 

فى رئاسة لجان مجلس الشعب بين مختلف القوى الاخوانيه 

وحرمان جميع القوى الاخرى (الكافره )منها !!!!هؤلاء هم الافاضل 

جماعة الاخوان المسلمين لذلك قررت الانضمام اليهم طمعاً فى 

دخول الجنه(مجلس محلى المحافظه)

ثم نظرت الى جماعة الاخوه السلفيين رضى الله عنهم هؤلاء القوم 

الذين كفروا الديموقراطيه وحرموا الخروج على الحاكم ثم أحتفلوا 

بيوم الخروج عليه!!!تلك الجماعه الوطنيه الاولى والتى كانت أولى 

الجماعات محاربةً لنظام مبارك حتى انها افتت بحرمة الخروج عليه!!

نظرت الى حالهم فوجدتهم أفضل بكثير من الاخوان وجدت فيهم 

موحد المصريين جميعاً العلامه الكبير عبدالمنعم الشحات والذى 

افتى بكٌفر الديموقراطيه ثم تراجع واعلن ان الديموقراطيه المصريه 

مؤمنه ومحترمه وبنت ناس ولكن الديموقراطيه الامريكيه هى  

الكافره ذلك العلامه والذى رقصت أصنام الفراعنه فرحاً برسوبه فى 

الانتخابات ثم نظرت اليهم لاجد فيهم يسري حماد ذلك الهرقل العتى 

الشجاع الذى ينادى بتطبيق شرع الله ثم لا يبرح ان يقوم بمداخله 

تليفونيه مع راديو الجيش الاسرائيلي ثم يعود ويتحدث عن شرع 

الله!!!! ثم وجدت منهم عميد الاعلاميين الاعلامى والداعيه القدير 

المهندس خالد عبدالله (ياواد يا مؤمن ) ثم وجدت منهم ايضاً عماد 

عبدالغفور رئيس حزب النور والذى أعلن عن عدم تهنئة الاقباط 

بعيدهم ثم أرسل أخوه الى الكنيسه لتهنئة الاقباط سراً !!! ثم نجد 

منهم ايضاً نادر بكار صاحب الابتسامه الساحره ثم وجدت منهم 

العلامه الذى أفتى ان وجه المراءة كفرجها!!!  ثم وجدت منهم فروع 

أخرى كالجماعه الاسلاميه والتى قتلت انور السادات لابرامه اتفاقية 

كامب ديفيد ثم اليوم أصبح لا مانع عندها من السلام مع الصهاينه 

الانجاس(وسبحان مغير الاحوال) ومنهم ايضاً الداعى الى الله بالدولار 

ومنهم من يرفع علم السعوديه ويهتف باسم بن لادن ويكفى انهم 

تدعمهم قطر والكويت والسعوديه هذه الدول التى تقيم شرع الله 

وتحارب الصهاينه والامريكان(قصدى بتصدر لهم غاز وبترول) كما ان 

منهم الامام الفاروق حازم صلاح ابواسماعيل والذى لو ان سيدنا ابو 

بكر بيننا لكان أمرنا باختياره رئيساً هذا العملاق هذا الهرقل( 

ال64حصان)  والذى اصبح اتصال أمريكا وفرض رائيها وسيطرتها على 

المسلمين فى وجهة نظره بشرى ونصر من الله !!!!(على أساس 

انه اتصال من سيدنا جبريل  وحسبي الله ونعم الوكيل)ولا أستطيع   

ان انسى ان منهم من افتى بجواز تزوير الانتخابات لصالحهم ومن 

افتى بان المسلم سيسئل عن دعمه للشريعه(رمز الفانوس) ولا 

ننسي ان منهم العنتيل الاسد الغضنفر حازم شومان صاحب العبارة 

الشهيره والتى قالها فى وجه الظلم والطغيان (الحمد لله الذى 

مكننى من الوقوف فى المكان (جامعة القاهره)الذى انشئ لتغييب 

شرع الله !! ولا يوجد أحد يستطيع ان ينكر دورهم فى الحركه 

الوطنيه حينما كانوا يخرجون بالالاف فى المظاهرات من أجل اختى 

كامليا شحاته وفى نفس الوقت لم يهتفوا بكلمه فى حق السلفي 

سيد بلال ولم يهتفوا ضد مبارك او امن الدوله انما هتفوا فى 

المظاهرات بهتافات لكامليا وعبير (الغير مؤكد اسلامهم) هذه نبذه 

مختصره عن السلفيين هؤلاء القوم الشجعان الذين حافظوا على 

مبادئهم وظلوا معتبرين الديموقراطيه كفر والانتخابات حرام وصوت 

المراءه  عوره والانتخابي حلال!!!لذلك قررت ان انضم لهؤلاء 

الاشاوس الكبار أصحاب المبادئ والقيم من  لم يتحرك لهم شارب  

لتعرية فتاه مسلمه  وسحلها وضربها و حرقوا البلاد لفتاه مشكوك 

فى امر اسلامها هؤلاء هم أمل مصر القادم واتمنى منكم جميعاً ان 

تراجعوا مواقفكم وتنضموا لهؤلاء حتى تستطيعوا حجز مقعد فى 

الجنه

واما بخصوص الثوار هؤلاء الخوارج والذين خرجوا على الحاكم مبارك 

رضى الله عنه وجدت فيهم  ليبراليا عاوز يقلع أمى الحجاب وزعلت  

جداً وقلت كله الا أمى وجدت فيهم بنى ادم زى البرادعى جاى 

وسايب منصبه الدولى لاجل كلمة حق عند سلطان جائر ضارباً أعلى 

المثل فى الجهاد والذى اسس الجمعيه الوطنيه للتغيير وقدم مطالب 

التغيير ووقف فى وجه مبارك رضى الله عنه

البرادعى العميل الخائن والذى همه الاول نهضة هذه البلاد ورفعتها!!

هذا الرجل الذى فى  كل برنامج يخرج علينا من منطقه 

عشوائيه(عاوز يقرفنا)وهذا الرجل الذى مشي فى المظاهرات مع 

الخوارج وضربه العسس بالمياه ولم يحترموا كبر سنه ومكانته الدوليه 

وهو القائد الحقيقي والاب الروحى للثوره المصريه الملعونه!! 

والحقيقه اننى وجدت ان هؤلاء الثوار اما شهداء واموات(الله يرحمه) 

واما مصابيين وعميان(الله يشفيه وينور بصيرته) واما مساجين 

ومعتقليين(ربنا يفك سجنه) فلذلك قررت ان ابعد عن هؤلاء الخوارج 

وانضم الى اهل الحنان والرضا أهل الاغلبيه اخوان وسلفيون 

خالص تحياتى / تائب من الليبراليه

ملحوظه انا هنضم للاخوان سبت واتنين واربع والسلفيين حد وتلات 

وخميس ويوم الجمعه تركته من أجل الماسونيه والليبراليه 

والعلمانيه وكل عام وانتم بخير

-- ملحوظه أخيره ومهمه قد يكون اى من هؤلاء أحسن منى خلقاً 

وأقرب الى الله منى ولكن لا يوجد أحد فى النقد --

يا ورده فى حياتى

ياورده فى حياتى
يا سبب اهاتى
يا حلم فى حياتى
يا سبب اهاتى
فى حبك ملاكى
وفى بعدك هلاكى
فى شوقك حياتى
وفى المك مماتي

فى شوقك وعنيكي

وفى لمسة ايدكي 

ماليش غيره هو طلب وحيد

اعيش معاكى واكون سعيد

لانى شفتك

ولمست حبك

ودخلتى قلبي 

وسكنتى فيه

 اعيش فى قربك

واموت فى بعدك

وافضل اقولك

يا حبي حبك

فى قلبى يملى  

حاجات كتير

الصوفيه والسياسه

هل الصوفيه معزولون سياسيأ؟

وهل من المتصوفه من مارس السياسه؟

وهل هى فى حاجه الى اظهار قوتها وحشد مليونيه للرد على السلفيين؟

الاجابه عن هذه الاسئله بحمد الله وتوفيقه  

ان الصوفيه ليسوا معزولون سياسياً بل ان الصوفيه وهى قائمه على ان تصل الى مقام الاحسان ان تعبد الله كانك تراه فان لم تكن تراه فانه يراك

وعلى ذلك فالامر بالمعرف والنهى عن المنكر من بديهيات الاسلام والعمل السياسي يوجب على المريد  ان يكون صادقاً مع الله 

فهو لا يبحث عن شهره زائفه ولا كرسي زائل.
فالتصوف قائم على الذهد  ولا يمنع ذلك من تحمل المسئوليه. 

فالامام الفاروق  عمر بن الخطاب كان امام الزاهدين بعد سيد المرسلين صلى الله عليه وعلى اله وصحبه وسلم وكان اعدل اهل الارض وكذا الخليفه الخامس عمرو بن عبدالعزيز.

ويذخر التاريخ بقاده عظام محسوبون على التصوف واهله مثل صلاح الدين الايوبى ومثل سيف الدين قظز ومثل عمر المختار والامير عبدالقادر الجزائري وغيرهم الكثير  .

فالتصوف سلوك روحى منهجى لا يمنع من ممارسة السياسه  بل يقننها فى اطار مراعاة الله باطناً وظاهراً فتكون اوامره ونواهيه من قلبه فتصل قلوب الناس  مستغله للبركه الالهيه التى حلت عليه لنقاء باطن السياسي المتصوف .

واقولها بكل ثقه لا يوجد حاكم متصوف واحد الا وخلده التاريخ  ولست فى حاجه الى حشد ادله على ذلك.

والتجربه التركيه الحديثه متمثله فى حزب العداله والتنميه الحاكم فى تركيا اشد الادله على ذلك فهو حزب على مرجعيه دينيه اسلاميه صوفيه

والحمد لله ان الحركه الصوفيه فى مصر ليست فى حاجه الى حشد مليونيه لاظهار قوتها فهى بالله ومن الله والى الله وابسط دليل على كثرة العدد والحشد ان مولد السيد أحمد البدوى باب المصطفى الامين فى الليله الختاميه يحشد له من احبابه اكثر من اثنين مليون متصوف ومحب فالحشد عند الصوفيه حشد للحب وللموده وليست لاظهار القوه.

والسفر عندهم  للتظاهر بحب ال البيت والاعتصام عندهم اعتصام على اعتابهم الطاهره
فهذا هو منهجهم  ولا يمنع المريد من ممارسه السياسه بل ان يراعى الله عز وجل فى كل تصرفاته وافعاله .

والله الموفق والمستعان